खोज

कावासोती अस । पूर्वी नवलपरासी नवलपुरको कावासोती नगरपालिका–७, रामनगरमा लामिचौर सामुदायिक होम स्टे सञ्चालनमा आएको छ । नवलपुरमा केही वर्षको अन्तरालमा तीनओटा होम स्टे सञ्चालन भइसकेका छन् ।

चितवन राष्ट्रिय निकुञ्ज क्षेत्र र नदीकिनार आसपासका नागरिकले पर्यटन, व्यावसायिक खेती तथा उन्नत पशुपालन गर्ने एकीकृत योजना कार्यान्वयन गर्न ‘लामिचौर सामुदायिक होम स्टे’ सञ्चालनमा ल्याउन लागेको संस्थाका अध्यक्ष जीवन सापकोटाले जानकारी दिए ।

संस्थाका अध्यक्ष सापकोटाले सामुदायिक होम स्टेलाई मनोरञ्जन र पर्यटकीय केन्द्रको रूपमा मात्र उपयोग नगरी समुदायभित्र खास सम्भावना हुने र त्यस सम्भावनाको सही निकास दिन सक्दा मात्रै दिगो र स्थायी विकासको आधार तयार हुने बताए ।

उनले आधुनिकता र परम्परागत सम्पदाको सही र सन्तुलित फ्युजन गर्दै होम स्टे, अत्याधुनिक थिएटर, गोठरहित तथा गोठसहितका क्षेत्र तयार गर्दै कृषि, पशुपालन, लघु उद्यमजस्ता कार्यक्रमलाई एकीकृत रूपमा अघि बढाउने योजना रहेको स्पष्ट पारे । तत्काल २५ ओटा होम स्टे बनाई आगामी वैशाखभित्रै सञ्चालनमा ल्याइने अध्यक्ष सापकोटाले जानकारी दिए ।