खोज

एजेन्सी । माल्दिभ्स भ्रमण गर्ने भारतीय पर्यटकको सङ्ख्या गएको वर्षको तुलनामा ३३ प्रतिशतले घटेको छ ।

एउनआईका अनुसार हरेक वर्ष दुई लाख जनाभन्दा धेरै पर्यटकका साथ भारत सन् २०२१ देखि २०२३ सम्म माल्दिभ्सका लागि शीर्ष पर्यटन बजार बनेको थियो । तर यो वर्ष ५४ हजार जनाभन्दा धेरै पर्यटकसहित चीन शीर्ष बजार बनेको छ ।

न्यु दिल्ली र मालेबीचको कुटनीतिक विवाद निरन्तर बिग्रँदै गएको कारण माल्दिभ्स पुग्ने भारतीय पर्यटकको सङ्ख्यामा उच्च गिरावट आएको माल्दिभ्सको पर्यटन मन्त्रालयको तथ्याङ्कलाई उद्धृत गर्दै त्यहाँको बेबसाइट अधाधुले जनाएको छ ।

पर्यटन मन्त्रालयको २०२३ को तथ्याङ्कअनुसार गएको वर्षको मार्च ४ सम्म ४१ हजार ५४ जना भारतीयले माल्दिभ्स भ्रमण गरेका थिए । यो वर्षको मार्च २ सम्म भने जम्मा २७ हजार दुई सय २४ जना भारतीय पर्यटक माल्दिभ्स पुगेका खबरमा उल्लेख छ । यो वर्ष गएको वर्षको तुलनामा १३ हजार जनाभन्दा कम भारतीय पर्यटक माल्दिभ्स पुगेका हुन् ।

गएको वर्षको यही अवधिमा भारत १० प्रतिशत बजार हिस्सेदारीसहित माल्दिभ्समा पर्यटकका लागि दोस्रो सबैभन्दा ठूलो स्रोत बजार थियो । तर अहिले छ प्रतिशत बजार हिस्सेदारीसहित भारत छैटौँ स्थानमा आइपुगेको छ ।